መራሕቲ ትግራይ ኣብ ኣዲስ ኣበባ

ኣመራርሓ ፓርቲ ብልጽግናን ህወሓትን ኣብ ኣዲስ ኣበባ ተራኺቦም ምኽክር የካይዱ ከምዘለዉ  ተፈሊጡ።

ኣመራርሓ ውድብ ህወሓትን ፓርቲ ልፅግናን ኣብ መቐለ ዝተጀመረ ዘተ ብምቕፃል ኣብ ኣዲስ ኣበባ ትማሊ 5 ሚያዝያ 2016 ዓ/ም ዘተ ምክያድ ከምዝጀመሩ ተፈሊጡ።

ኣብቲ ምኽክር ድማ ኣብ መንጎ ክልቲኦም ውድባት ዘተ ዝካየደሎም መትከላት ኣብ ምርድዳእ ብምብፃሕ ናይ ቀፃሊ ዘተ ዝካየደሎም ዛዕባታት ምንፃር ከምዝጀመሩ እውን ተሓቢሩ።

ዛጊድ ኣብ ፍሉያት ኣጀንዳታት ዝርዝር ዘተ ንምክያድ ኣብ ስምምዕ ከምዝበፅሑ እውን ተፈሊጡ። ብምክትል ፕሬዚደንት ውድብ ብልፅግና ኣይተ ኣደም ፋራህ ዝተመርሐ ጉጅለ ልኡኽ ብልፅግና ምስ ፈፃሚ ስራሕ ውድብ ህወሓት ብ24 መጋቢት 2016 ዓ/ም ኣብ መቐለ ዘትዩ ምንባሩ ይዝከር።
ኣብቲ ዘተ ብመሰረት ውዕሊ ፕሪቶርያ ፓለቲካዊ ዝርርብ ክልቲኦም ውድባት ቅድም ኢሉ ክጅመር ከምዝነበሮ ብምርድዳእ ኣብ ሓፂር እዋን ስሩዕ ዝርርብ ንኽጅምሩ ኣብ ስምምዕ ምብፅሖም ቤት ፅሕፈት ህወሓት ኣብ ድሕረ ገፁ ኣፍሊጡ ነይሩ።

ብመሰረት እዚ ድማ ሎሚ 05 ሚያዝያ ብኣቦመንበር ህወሓት ደብረጽዮን ገ/ሚካኤል |ዶ/ር| ዝምራሕ ኣመራርሓ እቲ ውድብ ናብ ኣዲስ ኣበባ ተጓዒዙ ምስ ኣመራርሓ ውድብ ብልፅግና ተራኺቡ ይዝቲ ምህላው ተሓቢሩ ።